बिपदग्रस्त पाँचपोखरी र हेलम्बु गाउँपालिकालाई मेलम्ची नगरपालिकाको आर्थिक सहयोग

राष्ट्रिय अनलाइन प्रकाशित: २०८० भदौ २६ गते १६:३२

यस बर्षको बाढी र पहिरोबाट प्रभावित बनेको पाँचपोखरी थाङपाल गाउँपालिकालाई मेलम्ची नगरपालिकाले आर्थिक सहयोग गरेको छ । गत भदौ १९ गते बसेको नगर कार्यपालिकाको बैठकले बाढी तथा पहिरो प्रभावित छिमेकी दुई पालिकाहरु हेलम्बु र पाँचपोखरी थाङपाल गाउँपालिकालाई १० /१० लाख सहयोग गर्ने निणर्य गरेको थियो ।

छिमेकी पालिकाहरुमा समस्या पर्दा थोरै भएपनि सहयोग पुगोस् भन्ने उद्धेश्यले आर्थिक सहयोग गरिएको नगर प्रमुख आइतमान तामाङले बताउनुभयो । रु १० लाखको चेक ग्रहण गर्दै पाँचपोखरी थाङ्पाल गाउँपालिकाका अध्यक्ष टासी लामाले सहयोगको लागी धन्यवाद ब्यक्त गर्नुभयो । उहाँले मेलम्ची नगरपालिका असल छिमेकीको रुपमा प्रस्ततु भएको भन्दै यसले गाउँपालिकालाई ठुलो सहयोग भएको बताउनुभयो । अध्यक्ष लामाले बाढी ग्रस्त तिन वटै पालिका मिलेर सघं र प्रदेश सरकारलाई झकझकाउनु पर्ने बताउनुभयो । हेलम्बु गाउँपालिकाका अध्यक्ष निमा ग्याल्जेन शेर्पा भने व्यस्तता कारण बुधबार मात्र उपस्थित हुने नगर प्रमुख तामाङले जानकारी दिनुभयो ।
रकम हस्तान्तरण कार्यक्रममा उपप्रमुख उमा प्रधान, प्रमुख प्रशासकीय अधिकृत निमेष मिश्र, वडाध्यक्षहरुः चन्द्रबहादुर तामाङ, अमृत खनाल, राजु रायमाझी, गणेश तामाङ र लेखा अधिकृत मुरारी पुडासैनी लगायतको उपस्थिति रहेको थियो ।