बकैयामा कार दुर्घटना: उपचारका क्रममा दुई घाइतेको मृत्यु

राष्ट्रिय अनलाइन प्रकाशित: २०८१ जेठ ५ गते १८:३२

मकवानपुरमा कार दुर्घटना हुँदा गम्भीर घाइते भएका दुई जनाको उपचारका क्रममा मृत्यु भएको छ। शनिबार बिहान साढे ७ बजे ललितपुरबाट हेटौँडा जाँदै गरेको ग ३ ९४७५ नम्बरको कार मकवानपुरको बकैयाँ गाउँपालिका-१२ चौतारामा भीरबाट खसेको थियो।

कार दुर्घटनामा परी घाइते भएका रौतहटको मौलापुर नगरपालिका-६ का १७ वर्षीय विवेक साह र मकवानपुरको बकैया गाउँपालिका-१२ का ६५ वर्षीय प्रेमलाल ब्लोनको उपचारका क्रममा मृत्यु भएको मकवानपुर प्रहरीले जनाएको छ।

कार चालक बाराको निजगढ नगरपालिका-६ का ३० वर्षीय सन्दीप साहको अवस्था गम्भीर छ। उनको हेटौंडा अस्पतालमा उपचार भइरहेको छ। जिल्ला प्रहरी कार्यालय मकवानपुरका अनुसार कार सडकबाट करिब पाँच सय मिटर तल खसेको थियो। कार दुर्घटनाग्रस्त अवस्थामा रहेको सूचना प्राप्त भएपछि इलाका प्रहरी कार्यालय ठिंगनबाट टोली खटिएको थियो।

कारमा सवार तीन जनालाई गम्भीर घाइते अवस्थामा उद्धार गरी उपचारका लागि हेटौंडा अस्पताल लगिएकोमा २ जनाको मृत्यु भएको हो।