मेलम्ची र इन्द्रावती नदिमा बाढी र पहिरोको कृतिम घटना अभ्यास
राष्ट्रिय अनलाइन
प्रकाशित: २०८१ जेठ २३ गते १७:४९
सिन्धुपाल्चोकको मेलम्ची र इन्द्रावती नदिमा बाढी र पहिरोको कृत्रिम घटना अभ्यास गरिएको छ । हेलम्बु गाउँपालिका र मेलम्ची नगरपालिकाको आयोजना र सामुदायिक विकास तथा वातावरण संरक्षण मञ्च (सिडिइसिएफ्)को प्राविधिक सहयोगमा हेलम्बु गाउँपालिकाको किउल र ग्याल्थुम तथा मेलम्ची नगरपालिकाको तालामाराङ र सिन्धुखोला नजिकै इन्द्रावती नदिमा नमुना कृत्रिम घटना अभ्यास देखाइएको हो । USAID (यु यस एड), अस्ट्रेलियन एड, प्राक्टिकल एक्सन, राइम्स, रेडक्रस सोसाइटि,नेपाली सेना, सशस्त्र प्रहरी बल, नेपाल प्रहरी,राइम्सको प्राविधिक सहयोगमा बाढीकोे कृत्रिम घटना अभ्यास देखाइएको हो ।
विपद् पूर्वतयारी तथा प्रतिकार्य योजनाको कार्यान्वयन, खोज तथा उद्धारमा प्रयोग हुने स्रोतसाधन र जनशक्तिको व्यवस्थापन तथा विपद्को काम गर्ने सबै सरोकारवालासँगको समन्वय तथा सहकार्यलाई प्रभावकारी बनाउन कार्यक्रमको आयोजना गरिएको प्राक्टिकल एक्सनका परियोजना अधिकृत मिनेश गुरुङले जानकारी दिनुभयो । । विपत् प्रतिकार्यका लागि यस्तो अभ्यास निकै प्रभावकारी हुने उहाँको भनाइ थियो ।
नदीमा बाढीले बगाएकाको खोजी तथा उद्धारका साथै प्राथमिक उपचारमा समेत के–कसरी व्यवस्थापन गर्ने भन्ने विषयमा कृत्रिम नमुना अभ्यास गरिएको गुरुङले जानकारी दिनुभयो । बाढीले बगाएको अवस्थामा तत्काल गरिने खबर, प्रारम्भिक चरणमा गरिने खोज उद्धार, घाइतेलाई अस्पताल पु¥याउनुअघि गर्न सकिने प्राथमिक उपचार र अस्पतालसम्म पु¥याउन गरिने सहयोगजस्ता विषयलाई लक्षित गरी नमुना अभ्यास गरिएको सामुदायिक विकास तथा वातावरण संरक्षण मञ्च (सिडिइसिएफ्)का परियोजना संयोजक तथा विपद् फोकल पर्सन इच्छाराम सापकोटाले बताउनुभयो ।
सेना,प्रहरी र सरोकारवाला निकायसँगै विपद्बाट प्रभावितहरुलाई समेत घटना अभ्यासमा सहभागि गराइएको सापकोटाले बताउनुभयो । यसअघि (सिडिइसिएफ्),प्राक्टिकल एक्सन लगायतका संस्थाले स्थानिय तहसँगको समन्वयमा बाढी,पहिरो र प्राथमिक उपचार कार्यदल निमार्ण गरेको र त्यहिँ कार्यदलसागै समुदायलाई पुर्नताजगी र सचेतनाको लागि यस्तो अभ्यास गरिएको सापकोटाले बताउनुभयो ।
नमुना अभ्यासले विपत् प्रतिकार्यका सन्दर्भमा प्रत्येक वडाहरूमा तालिमप्राप्त जनशक्ति तयार गर्नुपर्ने हेलम्बु गाउँपालिकाका प्रमुख निमा ग्याल्जेन शेर्पाले बताउनुभयो । उहाँले बाढीसँगै पहिरो,आगलागी लगायतका घटनाहरुलाई समेत यस्ता कार्यक्रममा जोड्नुपर्नेमा जोड दिनुभयो । नमुना अभ्यासका क्रममा एक्कासी बाढी आएको मेलम्ची खोलाले एकजना ब्यक्तिलाई बगाएर ल्याउँछ र बचाउँ बचाउँ भनेको आवाज सुनेपछि रेडक्रसका प्रतिनिधि,विपद कार्यदलका सदस्यहरु,सुरक्षाकर्मीको टोली घटनास्थल पुग्छन र उद्धारमा खटिन्छन् । उद्धारपछि प्राथमिक उपचार लगत्तै एम्बुलेन्स मार्फत अस्पताल पुर्याइन्छ ।
बर्खाको समयमा बाढीपहिरोले जनधनको क्षति पु¥याउन सक्ने अवस्थालाई मध्यनजर गर्दै उद्धारको कृत्रिम घटना अभ्यास देखाएकोे हो । जसमा स्थानियतहका जनप्रतिनिधि। कर्मचारी,स्वास्थ्यकर्मी,सुरक्षाकर्मी,सरोकारवालाहरु, शिक्षक,विद्यार्थी लगायतको उपस्थिती रहेको थियो ।
विपद्बाट क्षति पुग्ने र विपद्को सामना गर्ने पहिलो वर्ग भनेकै स्थानीय समुदाय भएको हुनाले स्थानीय समुदायलाई विपद् जोखिम न्यूनीकरणमा जागरुक बनाउन, विपद्सँग सम्बन्धित योजना तथा कार्यक्रम तर्जुमा गर्न तथा विपद्को घटनाको समयमा प्रतिकार्यलाई प्रभावकारी तवरले परिचालित हुन समुदाय स्तरमा खोज तथा उद्धार कार्यदल गठन गरी खोज तथा उद्धार तालिमको आयोजना गरिएको सापकोटाले बताउनुभयो ।
समुदायस्तरमा गठित कार्यदलहरूको खोज तथा उद्धार गर्न सक्ने क्षमता अभिवृद्धि गर्ने तथा भविष्यमा हुन सक्ने मानवीय, आर्थिक तथा भौतिक क्षतिलाई न्यूनीकरण गर्न सामुदायिक विपद् व्यवस्थापन समिति र समितिअन्तर्गतको कार्यदललाई सङ्गठित गर्न तालिम प्रदान गरिएको थियो । विपद व्यवस्थापनका लागि परियोजना, स्थानीय सरकार, जल तथा मौसम विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग समन्वय गरी मेलम्ची र हेलम्बु क्षेत्रमा पूर्वसूचना प्रणाली स्थापना गरिएको छ ।
प्रतिक्रिया