आन्तरिक तथा बाह्य पर्यटकको गर्मी छल्ने गन्तव्य बन्दै इन्द्रावती नदि

राष्ट्रिय अनलाइन प्रकाशित: २०८१ जेठ २७ गते २१:५४

अहिले देशभर अत्यधिक गर्मी बढेको छ । गर्मी बढेसँगै आम जनमानस गर्मीले छटपटाइरहेको यो बेला मेलम्ची बजार नजिकै रहेको इन्द्रावती नदिमा पौडी खेल्नको लागी अहिले आन्तरिक तथा बाह्य पर्यटकको भिड लागेको छ ।
केटाकेटी, युवादेखि वृद्धहरु समेत अहिले इन्द्रावती नदिमा पुग्नेगरेका छन् । यतिवेला गर्मी छल्न मेलम्ची स्थित इन्द्रावती नदि पुग्नेहरूको भीड देख्न सकिन्छ ।

काठमाडौ उपत्यका बाट नजिकको गन्तव्य मेलम्चीमा अहिले कन्चन इन्द्रावती नदिमा पौडी खेल्दै मेलम्चीको लोकल माछाको स्वादमा रमाउने पर्यटकहरु थुप्रै भेटिन्छन् । विशेषत शुक्रवार र शनिबार मेलम्चीमा बाक्लै भिड लाग्ने गरेको छ । काठमाडौ,भक्तपुर,ललितपुर उपत्यका र सिन्धुपाल्चोक आसपासका विशेषत युवा जमातको लागी अहिले इन्द्रावती नदि केन्द्रविन्दु बनेको छ ।
उपत्यकाबाट नजिकै र थोरै समयमा पनि निक्कै मनोरञ्जन लिन सकिने भएकाले पनि इन्द्रावती नदि धेरैको रोजाइमा परेको काठमाडौ देखी पौडी खेल्नकै लागी आउनुभएका प्रवेश पौडेलले बताउनुभयो ।

अहिले बाइक रेसरहरु,स्कुल तथा कलेजका विद्यार्थी,विभिन्न अफिसका कर्मचारीहरुले भरिने इन्द्रावती नदिमा स्थानीय तहले पुर्वाधारको क्षेत्रमा केहि लगानी गरे अझै पर्यटनको संख्या बढ्ने र आन्तरिक स्रोतको समेत वृद्धि हुने अर्का पर्यटक रन्जन खड्काले बताउनुभयो ।
मेलम्ची हुँदै हेलम्बु,पाँचपोखरी,इन्द्रावती लगायत स्थानहरुमा आफ्नै सवारी साधनमा यात्रारत अधिकांश यात्रुहरुलाई यतिवेला इन्द्रावती नदिले लोभ्याउने गरेको छ ।

पौडी खेल्नका लागी पुग्नुभएका स्थानीय रामचन्द्र सापकोटा लाई पनि नदिमा केहि काम गर्न सकेमा पर्यटन प्रबर्द्धन गर्नसकिने बिश्वास छ । बगिरहेको खोलामा त यति धेरै मान्छे आउछन्,अझै खोलामा डुङ्गा हाल्न सकेमा,खाजा तथा खाना होटलहरु अस्थायी रुपमै भएपनि वरिपरि राख्ने हो भने आन्तरिक स्रोतको समेत विकास हुने र स्थानीयले आम्दानी गर्न सक्ने बताउनुहुन्छ ।
२०७८ सालमा आएको बाढी पछि खोलाले धार परिबर्तन गर्ने र विभिन्न खाले धारिलो सामग्री जस्तै रड,सिसाका टुक्रा,काटिकिला,बोतलको टुक्रा बगाएर ल्याएका कारण असुरक्षित रहेको खोलामा बाढी गएको ३ बर्ष पछि निर्धक्क पौडी खेल्दै आनन्द लिने अवसर स्थानीयले पनि पाएका छ्न ।

मेलम्ची नगरपालिका वडा नम्बर ११ का अध्यक्ष चन्द्र तामाङ इन्द्रावती र मेलम्ची नदिलाई पर्यटन संग जोडेर आम्दानी लिन सकिने बताउनुहुन्छ । होटल तथा होमस्टेको ब्यबस्थापन गर्ने,डुङ्गाको ब्यबस्थापन गर्ने,पार्कको रुपमा विकास गर्ने हो भने स्थानीयले समेत प्रत्यक्ष लाभ लिन सक्ने तामाङले बताउनुभयो । उहाँले आगामी बर्ष यो बर्खा सक्केपछि त्यो ठाउँलाई कसरी अगाडि बढाउने भन्ने बिषयमा छलफल गर्ने बताउनुभयो ।

नगरपालिकाका प्रमुख आइतमान तामाङले स्थानीय अन्य पर्यटकीय स्थलहरु समेत प्रचार प्रसारको कमिले उपत्यका बाट नजिक भएपनि ओझेलमा परेको बताउनुभयो । उहाँले हेलम्बु,पाँचपोखरी लगायत मेलम्चीका विभिन्न पर्यटकिय स्थल पुगेर थाकेर फर्केका पर्यटक हरुलाई मेलम्चीले थकाइ मार्नेगरि स्वागत र सत्कार गर्नुपर्ने बताउनुभयो ।
नगर प्रमुख तामाङले पर्यटन प्रबर्द्धन गर्नका लागी नगरपालिकाले योजना बनाएर अगाडि बढ्ने प्रतिबद्धता जनाउनुभयो । उहाँले जतिसक्दो धेरै पर्यटक भित्र्याउने र स्थानीयलाई आयआर्जन संगपनि संगै जोड्नका लागी नगरपालिका लागी रहेको बताउनुभयो ।
मेलम्ची आसपासमा हेलम्बुको ग्रेटट्रेल,झर्ना,पाल्चोक मन्दिर,विभिन्न गुम्बाहरु,आमायाङ्री,पाँचपोखरी,नागिथाम डाँडा,ड्राइगन झर्ना,ड्राइगन गुफा,मेलम्चीको गुफा डाँडा,धौले,मिनि चियाबगान भोटेचौर र तपचुली मुख्य पर्यटकीय स्थलहरु हुन् । यहाँ आउने पर्यटनको संख्यामा अहिले वृद्धि भइरहेको छ ।